Enviado por laborate o lun, 27/12/2010 - 15:10 GMT.
Richard Eberlin, oficial da FAO
en materia de Posesión da Terra e Desenvolvemento Rural
na oficina rexional de Budapest, participou no
Master en Xestión Sostible da Terra e do Territorio,
abordando a situación estrutural en Asia occidental e en
Europa central e do leste.
Durante as clases impartidas por este oficial da FAO explicáronse
os procesos de restitución e privatización logo da caída
do muro de Berlín, así como a problemática da fragmentación
da terra na actualidade. Amosou, ademais, como se están a
impulsar diferentes instrumentos de xestión de terras como
a concentración parcelaria integral ou os bancos de terras,
nun marco xeral de desenvolvemento rural.
Neste último apartado destaca a elaboración do Informe Técnico
sobre Bancos de Terras impulsado por parte da organización
internacional e no que participan membros do grupo de investigación
LaboraTe, da Universidade de Santiago de Compostela, así
como persoal técnico do Banco de Terras de Galicia
(Bantegal). De feito, o Bantegal é considerado como un modelo
a explorar en numerosos países de Europa oriental, existindo
xa na actualidade proxectos piloto para testalo.
Richard Eberlin adiantoulles tamén ós alumnos do
master a posibilidade de realizar
estadías na súa organización, tanto nas oficinas de Roma
como de Budapest, e colaborar e coñecer de primeira man
as actividades en materia de posesión da terra e desenvolvemento
rural que está a impulsar a nivel internacional.