Enviado por laborate o lun, 24/01/2011 - 19:14 GMT.
O LaboraTe vén de realizar, co apoio da
Axencia Galega de Desenvolvemento Rural
(AGADER), un estudo no que se desenvolve unha metodoloxía
de análise da posesión e uso da terra para a comprensión
e diagnose das dinámicas territoriais, así como a avaliación
dos sistemas de administración de terras existentes en Galicia
e a súa idoneidade para apoiar as actividades de xestión de terras.
Dito traballo encádrase na crecente cooperación entre a
Organización das Nacións Unidas para a Alimentación e a Agricultura
(FAO) e a USC, que está sendo apoiada por parte do AGADER
na procura dun maior beneficio para o rural galego. En concreto,
a FAO e a USC perseguen a través de diversas actividades
no período 2010-2012, a mellora da xestión sustentable
da terra e do territorio e das políticas de desenvolvemento
rural, o fortalecemento do know-how
rexional, o impulso á cooperación rexional no ámbito da
xestión de terras e do territorio e a elaboración de informes
técnicos, directrices, recomendacións, manuais ou outro
tipo de traballos en apoio á xestión de terras e do territorio
e do desenvolvemento rural.
Os resultados do devandito estudo amosan que mália a grande
complexidade na situación de posesión e uso da terra, existen
diversas fontes de información sectoriais a disposición
Administración que, integradas axeitadamente, permiten un
coñecemento moito máis preciso das súas dinámicas, así como
un deseño e seguemento das políticas de xestión de terras
moito máis certeiro. Para este traballo seleccionouse a
comarca de A Terra Chá como ámbito piloto, dada a súa relevancia
agraria no contexto galego.