Enviado por laborate o lun, 17/10/2011 - 13:37 GMT.
O pasado 14 de Outubro, no marco do
Máster en Xestión Sustentable da Terra e do Territorio
(MTT), José Manuel Silva Rodríguez, director xeral de agricultura
da Unión Europea, impartiu a conferencia "As perspectivas
financieiras da reforma da Política Agraria Común".
Na súa intervención salientou, entre outros, o establecemento
de tres novos principios na nova Política Agraria Común:
- Redistribución de beneficios.
- Converxencia, no senso de axudas iguais para rexións agrarias homoxéneas.
- Elemento verde, como compensación polos beneficios medioambientais e sociais das actividades agrícolas.
Cómpre tamén salientar a aparación de tres novos elementos:
- Fondo de crise (por exemplo, a recente crise E. coli).
- Fondo para evitar os efectos da globalización.
- Programa de investigación agraria.
Silva Rodríguez
explicou tamén as razóns da desaparición dos pagos históricos,
a ligazón das axudas á terra no canto dos productores e
os potenciais conflitos con outras políticas europeas e
internacionais ("caixa verde" e "caixa azul", tratados da
Organización Mundial do Comercio...),
salientando que dende Bruxelas hai que gobernar "para todos"
e tendo en conta a dificultade de xestionar o territorio.
Falouse tamén do longo debate que se agarda no Parlamento
Europeo, do reparto dos fondos que se produce dentro de
cada país e da responsabilidade que deben ter os dirixentes
nacionais á hora de xestionar o seu propio territorio, apelando
a que non empreguen a "Europa" para evadir responsabilidades.
A conferencia rematou cunha rolda de preguntas aberta, onde
empregados públicos e representantes de sindicatos e cooperativas,
entre outros, amosaron os seus puntos de vista e formularon
distintas preguntas.
Finalmente, nun acto separado os alumnos do máster MTT recibiron unha clase de Silva Rodríguez.
ligazóns relacionadas