Enviado por eva.lopez o ven, 04/03/2016 - 10:30 GMT.
Este martes, 1 de marzo, presentouse o Catálogo das Paisaxes
de Galicia en Santiago de Compostela. A presentación dos
traballos correu ao cargo da directora do Instituto do Territorio,
Inés Santé. A dirección científica dos catálogos, ao cargo
do Laboratorio do Territorio, estivo representada polo seu
coordinador, David Miranda, que explicou a participación
do LaboraTe na elaboración dos traballos, facendo fincapé
na visión funcional da paisaxe e no seu carácter multidisciplinar
e poliédrico, e Eduardo Corbelle, que explicou a metodoloxía
empregada para delimitar as unidades de paisaxe.
Marcos Pérez, da Fundación Galicia Sustentable, sinalou
a relevancia dos procesos de participación pública e a necesidade
de mellora desta práctica na xestión territorial. Finalmente
Alfredo Ríos, subdirector do IET, deu conta da fase das
directrices e o proceso participativo que se vai levar a
cabo nas 50 comarcas paisaxísticas para elaborar as directrices
da paisaxe. Ao acto concorreron ao redor dunhas 50 persoas.