Enviado por eva.lopez o mér, 01/06/2016 - 11:39 GMT.
O Laboratoiro do Territorio (LaboraTe) da Universidade de
Santiago de Compostela (USC) organiza este venres, 3 de
xuño, un acto de homenaxe ao que foi o seu fundador e coordinador
durante moitos anos, o profesor Rafael Crecente Maseda.
Será a partires das 11:30 horas, no Salón de Actos da Escola
Politécnica Superior de Lugo e contará coa presenza do ex
Director Xeral de Agricultura e ex Director Xeral de Investigación
da Unión Europea, José Manuel Silva Rodríguez.
Rafael Crecente, foi profesor titular do Departamento de
Enxeñería Agroforestal da Escola Politécnica, e faleceu
en xullo de 2015. Era considerado como un dos grandes expertos
en xestión territorial tanto en Galicia como fóra do noso país,
e o seu labor estivo vinculado coa investigación, sendo director
do Laboratorio do Territorio e coordinador do Sistema de
Información Territorial (SIT). Asemade, participou activamente
como investigador en países de Latinoamérica, fundamentalmente
en Ecuador -lugar no que impulsou un programa de colaboración-,
así como en convenios con países de Europa central e do leste.
Tamén foi consultor da oficina rexional da FAO en Budapest
e profesor invitado na Universidade de Múnich.
Desenvolvemento do acto
O acto de homenaxe comezará cunha breve exposición da biografía
do homenaxeado. A continuación, Silva Rodríguez ofrecerá
unha charla sobre xestión territorial. O evento rematará
coa clausura, na que se entregará aos asistentes unha publicación
dos traballos de fin de máster de terceiro e cuarto ano.
O prólogo destas edicións corresponde a Inés Santé, actual
directora do Instituto de Estudos do Territorio (IET); organismo
autónomo da Xunta de Galicia, adscrito á Consellería de Medio
Ambiente e que ten entre outros cometidos a realización de
estudos e actividades de planificación para avanzar cara
o reequilibrio entre o mellor aproveitamento de recursos
naturais de Galicia e a correcta conservación dos elementos
definitorios do país.