Enviado por eva.lopez o ven, 03/06/2016 - 14:02 GMT.
O Laboratorio do Territorio (LaboraTe) da Universidade de
Santiago de Compostela (USC) convoca o Premio "Rafael Crecente"
de Iniciativas Innovadoras de Xestión Territorial. Así o
deu a coñecer o coordinador do mesmo, David Miranda Barrós,
no acto de homenaxe ao fundador de dito grupo, que faleceu
o pasado ano e que lle dá nome ao citado galardón.
Tal e como explicou David Miranda, o premio está dirixido
a alumnos/as universitarios/as (egresados) que rematasen
a súa carreira (grao/máster) nos últimos cinco anos de calquera
titulación, e consistirá, ademais do correspondente diploma
de recoñecemento, nun contrato laboral de 6 meses no Laboratorio
do Territorio para integrarse en proxectos de investigación-acción
relacionados coa xestión territorial.
"Reforzamos así", explicou o coordinador, "o compromiso
iniciado por Rafa cos alumnos egresados para que se integren
no mundo da investigación-acción". Deste xeito, o arquitecto
Mario Crecente -irmán do homenaxeado-, incidiu en que o
premio ten como obxectivo impulsar o desenvolvemento de
ideas pioneiras relacionadas co desenvolvemento rural, a
conservación do medio ambiente, a mellora da produción agraria
nun senso amplo e a contribución á xestión territorial sostible.
Para elo, contarase cunha comisión de selección composta
por expertos nesta materia provintes da Universidade, Administración
e o sector privado.
A primeira convocatoria sairá a inicios de curso (setembro).
Abrirase un prazo de presentación de candidaturas ata febreiro
de 2017 e o fallo producirase a finais de maio para en xuño
realizar o correspondente acto de entrega do premio. A incorporación
da persoa levarase a cabo en setembro.
Sentida e ampla homenaxe
O Salón de Actos da Escola Politécnica Superior de Lugo
quedouse pequeno para acoller a homenaxe, que contou coa
intervención do ex Director Xeral de Agricultura e ex Director
Xeral de Investigación da Unión Europea, José Manuel Silva
Rodríguez. Preto de 200 persoas completaron o aforo da sala.
Entre elas, familiares e amigos do homenaxeado, así como
destacadas autoridades institucionais. É o caso da conselleira
de Infraestruturas, Ethel Vázquez; o ex reitor da Universidade
de Santiago de Compostela, Juan Casares; o vicerreitor do
Campus de Lugo, Javier Bueno; ou do deputado no Congreso por
Lugo, Joaquín García Díez; entre outros.
No evento expúxose un breve resumo da biografía e traxectoria
profesional do homenaxeado. Neste senso, David Miranda,
non dubidou en recoñecer que "Rafael Crecente era considerado
como un dos grandes expertos en xestión territorial de Galicia".
Foi profesor titular do Departamento de Exeñería Agroforestal
da Escola Politécnica, e o seu labor estivo vinculado coa
investigación, sendo director do Laboratorio do Territorio
e coordinador do Sistema de Información Territorial (SIT).
Asemade, participou activamente como investigador en países
de Latinoamérica, fundamentalmente en Ecuador -lugar no
que impulsou un programa de colaboración-, así como en convenios
con países de Europa central e do leste. Tamén foi consultor
da oficina rexional da FAO en Budapest e profesor invitado
na Universidade de Múnich.
O encontro, que destacou polo seu carácter emotivo e didáctico,
rematou cunha clausura na que os asistentes recibiron unha
publicación dos traballos de terceiro e cuarto ano do Máster
en Xestión Sostible da Terra e do Territorio, do que era
coordinador o profesor Crecente. O prólogo desta edición
corresponde a Inés Santé, actual directora do Instituto
de Estudos do Territorio (IET); organismo autónomo da Xunta
de Galicia, adscrito á Consellería de Medio Ambiente, e
que ten entre outros cometidos a realización de estudos
e actividades de planificación para avanzar cara o reequilibrio
entre o mellor aproveitamento de recursos naturais de Galicia
e a correcta conservación dos elementos definitorios do país.