Enviado por laborate o mér, 01/12/2010 - 14:19 GMT.
O Laboratorio do Territorio (LaboraTe) da Universidade de
Santiago de Compostela (USC), acaba de entregar ó concello
de Lugo a primeira reprodución en tres dimensións da
muralla romana de Lugo,
monumento que no ano 2000 foi declarado
Patrimonio da Humanidade
pola UNESCO.
Durante os anos 2008, 2009 e 2010 LaboraTe realizou duos
levantamentos topográficos deste monumento para o Servizo
de Arqueoloxía do concello de Lugo. Estes levantamentos
topográficos veñen a encher un oco moi importante de información
sobre a muralla, xa que antes só se dispoñía de estudios
previos e parciais, ou sen referencias, que imposibilitaban
a integración con outros estudos ou coa cartografía existente
da cidade.
O primeiro dos levantamentos topográficos consistiu nun
de tipo clásico da muralla e mailo seu contorno, e o segundo
nun feito con tecnoloxía Láser Escáner Terrestre
que só abrangue o monumento. Ámbolos dous fixéronse con
equipamento e medios do Sistema de Información Territorial
(SIT) da USC.
Este uso da tecnoloxía de medición Láser Escáner Terrestre
é pioneiro en Galicia, sendo aínda escasos os traballos
realizados con esta ferramente na nosa comunidade autónoma,
e testimoniais as medicións deste tipo; nin sequera a nivel
nacional tense feito, polo de agora, ningunha medición da
envergadura e complexidade que presenta a muralla de Lugo.
O Láser Escáner Terrestre estase a erguer como a ferramenta
máis axeitada para o estudo do patrimonio histórico, xa
que permite realizar documentacións xeométricas de superficies
e volumes con extrema precisión e grande densidade de información.
O resultado do levantamento topográfico con Láser Escáner
Terrestre foi unha nube de máis de 100 millóns de puntos
cuxa resolución que oscila entre 3 e 5 centímetros, e que
posibilita o desenvolvemento de modelos tridimensionais de
grande precisión. Ademais dos puntos de cada área escaneada,
recolléronse fotografías que informan do estado das zonas
estudadas e tamén a cantidade de luz láser reflectida pola
superficie, dato moi útil para o estudo de materiais.
Aparte dos puntos que definen a figura básica do monumento,
tomáronse outros correspondentes a elementos ou accidentes
particulares tales como resaltes, grietas, varandas ou escaleiras,
e prestouse tamén especial interés a elementos de alto valor
arqueolóxico, ata agora nunca topografiados, como as escaleiras
primitivas escavadas, fustes incrustados, aras ou aspilleras
embebidas nos muros ou a liña primitiva da zona do Reduto
de María Cristina.
O produto deste levantamento topográfico conforma a información
base que vai posibilitar o desenvolmento, nos vindeiros
anos, de numerosos traballos de grande precisión relacionados
coa muralla como modelos dixitais realistas, reconstrucións
virtuais, elaboración de material divulgativo, estudos de
deformacións, grietas ou estados de conservación...
Así, a partires de agora o concello de Lugo conta con datos
topográficos punteiros tanto en precisión como en volume,
e con múltiples aplicacións, como
- actuacións urbanísticas
- promoción do turismo
- conservación do patrimonio histórico
- investigacións e estudos técnicos
enlaces relacionados con esta nova: