Enviado por laborate o mér, 26/10/2011 - 11:05 GMT.
O pasado 25 de Outubro, publicouse no diario
El Progreso de Lugo
unha entrevista a Rafael Crecente, director do LaboraTe,
na que fala do máster en Xestión Sustentable da Terra e do Territorio,
que xa vai pola segunda edición, e da ordenación territorio
en Galicia.
Acerca dos obxectivos do máster e mailo seu enfoque: "Pretende,
por unha parte, atender as especifidades e necesidades de
Galicia, e tamén a situación de crise multinivel e multitema:
enerxética, alimentaria, financieira... Trátase de deseñar
e desenvolver estratexias que respondan a esa situación
a partir dos recursos e do enfoque territorial, que é ver
cales son os recursos e as potencialidades do territorio
galego. [...] A terra como recurso natural é a base de partida
para transformar terra en territorio, un conxunto de actividades
que pretenden a mellor organización dos recursos naturais,
da sociedade que os xestiona e das regras que determinan
a súa utilización. E no que se refire a Galicia cun foco
moi intenso nesas condicións tan singulares de propiedade
e como conciliar ese interese individual cos usos e intereses
colectivos. Aquí somos moitos propietarios, que por unha
parte é bo, pero por outra parte é difícil de xestionar."
A procedencia e formación dos alumnos do máster é moi variada:
"Temos alumnos de once titulacións diferentes e cinco países
distintos. O ano pasado fixeron unha estadía de dez días
con alumnos de universidades portuguesas, holandesas, búlgaras
e ata chinesas en Aveiro. Esa interacción e verse expostos
a problemas reais resultoulles moi interesante. E é algo
que imos ofertar este ano outra vez. A distinción da escola
de Lugo é que aquí usamos fundamentalmente tecnoloxía de
información xeográfica. Sustitúese a tecnoloxía do cabalo
de vapor do tractor pola tecnoloxía da información xeoespacial."
Sobre a ordenación do territorio: "Agora fálase dunha nova
lei do solo. Levamos varias que fallan sistematicamente,
na miña opinión porque sempre se abordan desde o mesmo enfoque.
A lei ten que considerar outras cuestións, o urbano e o
rústico, non centrándose só no fenómeno construtivo, a terra
pode ter outras utilidades. [...] Deberíamos atender as
características da propiedade, esa capa que subxace e que
condiciona todo. Faríanos máis efectivos para combater os
lumes, o abandono, a urbanización difusa, a contaminación,
porque no caso de Galicia teñen un denominador común: a
xestión da propiedade, e aí pretendemos aportar algo."
E por último, unha nota optimista: "Galicia é moi diversa.
Hai quen di que somos moi complicados, pero iso é unha fortaleza,
porque supón que tes moitas posibilidades de resposta partindo
de situacións diferentes."
ligazóns relacionadas: