Enviado por laborate o lun, 21/11/2011 - 14:06 GMT.
Os investigadores do LaboraTe Francisco José Ónega, José
María Tubío e Andrés Manuel García veñen de participar do
8 ao 10 de Outubro no evento que tivo lugar en Portugal
dentro do proxecto F:ACTS!.
F:ACTS! (Forms for: Adapting to Climate Change through Territorial Strategies!)
é un proxecto financiado polo programa
Interreg IV
da Comisión Europea, no que participan 14 organismos parceiros
de 8 países. Dentro dos socios españois do proxecto, atópanse
a Consellería de Medio Rural
e a USC. F:ACTS! busca xerar coñecemento sobre estratexias
territoriais integradas de adaptación ao cambio climático
a través do intercambio de experiencia e boas prácticas
entre os seus parceiros. Do mesmo xeito búscase adquirir
nova experiencia neste eido mediante a posta en práctica
deste tipo de estratexias en 5 proxectos piloto. As estratexias
territoriais integradas buscan a adaptación ao cambio climático
mediante políticas e instrumentos orientados a propiciar
os cambios na posesión e uso da terra e a multifuncionalidade
da mesma.
Durante o evento de Portugal asistiuse no museo do viño
de Peso da Régua, a unha presentación de tres instrumentos
de planificación portugueses: ITI (Intervención Territorial
Integrada), PAT (Plans de Acción Territorial) e ZIF (Zonas de Intervención Florestal).
Posteriormente varios expertos fixeron unha introdución aos
problemas derivados do cambio climático na rexión do Douro
Viñateiro, e falaron de cómo se estaban a aplicar os ZIF
no concello de Mação para previr os incendios forestais
e do ITI do Douro Vinhateiro destinado a conservar as paisaxes
culturais da rexión. Logo realizouse unha sesión de traballo
para analizar as potencialidades dos tres instrumentos para
aplicar estratexias territoriais integradas.
Tamén se visitou o proxecto piloto do espazo da
Rede Natura 2000
do Baixo Vouga Lagunar, onde se fixo unha visita de campo
cun experto da Universidade de Aveiro na área. Despois asistiuse
na biblioteca municipal de Estarreja a varias conferencias
sobre os plans de adaptación ao cambio climático de Portugal,
xestión hidrolóxica e os plans de xestión da área do Baixo
Vouga Lagunar.
No derradeiro día, asistiuse a varias conferencias en Porto
sobre a adaptación ao cambio climático nos plans sectoriais
da rexión norte de Portugal, as medidas de aforro enerxético
que está a promover a Axencia da Enerxía de Porto e os plans
de rehabilitación do casco histórico de Porto. O evento
concluíu cunha reunión de coordinación das actividades de
F:ACTS!.