Enviado por laborate o mér, 22/02/2012 - 21:59 GMT.
O pasado 17 de Febreiro, no marco do
Máster en Xestión Sustentable da Terra e do Territorio
(MTT), José Manuel Silva Rodríguez, director xeral de agricultura
da Unión Europea, impartiu a conferencia "A nova Política
Agraria Común como oportunidade para a xestión de terras".
Nesta ocasión Silva Rodríguez centrou a súa conferencia
nas oportunidades para a ordenación do territorio que a
nova Política Agraria Común
(PAC), que entrará en vigor no ano 2014, pode traer a Galicia.
Estas oportunidades non se poden perder xa que «Se non se
fai agora vai ser difícil facelo, xa que cada vez hai unha
maior esixencia na ordenación do territorio».
Un dos grandes problemas que hai é a existencia dun gran
número de parcelas sen uso, cuxos propietarios en moitos
casos non viven en Galicia e que, ademais, non teñen intención
de vender ou alugar - mália a existencia de iniciativas
como o Banco de Terras de Galicia
- a agricultores e gandeiros que si precisan delas. Silva
Rodríguez reclamou que se tomasen medidas legais que poñan
fin a esta situación: «Os poderes públicos non poden obrigar
a ninguén a arrendar as súas terras, pero si poden impoñer
un imposto por non facelo».
Silva Rodríguez dixo que Galicia precisa de explotacións
gandeiras máis sostibles para fomentar unha alimentación
máis natural do gando, e estar en mellores condicións de
facer fronte ós problemas de seguridade alimentaria, que
calificou de «terribles», que por riba é «máis agudo que
antes, pola dependencia das materia primas». «Os nosos pastos
deberían conseguir unha maior productividade, dadas as condicións
climáticas, e producir máis pastos de calidade.»
Nese senso tamén indicou que a nova PAC será tamén unha
oportunidade para a comunidade universitaria, xa que precisará
de investigación aplicada á xestión de terras, estudos sobre
aspectos sociais, análise da propiedade privada, programas
medioambientais... cuestións que en moitos casos condicionan
a dinámica da mobilidade de terras en Galicia.
A conferencia rematou cunha rolda de preguntas aberta, na
que os estudantes do máster MTT e xente interesada en xeral
amosaron os seus puntos de vista.
ligazóns relacionadas: