Enviado por laborate o ven, 04/05/2012 - 12:30 GMT.
O LaboraTe participou na visita de estudo que o proxecto
F:ACTS!
fixo a Patra (Grecia) do 26 ó 29 de Abril.
F:ACTS! é un proxecto financiado polo programa INTERREG IV
que persegue xerar coñecemento sobre estratexias territoriais
de adaptación ó cambio climático a través da colaboración
e intercambio de experiencias entre 14 parceiros - sendo
un deles a Universidade de Santiago de Compostela, a través
do Laboratorio do Territorio - de 8 países membros da Unión
Europea. O Laboratorio do Territorio (LaboraTe) asume dentro
do proxecto as tarefas de recopilación e difusión das boas
prácticas identificadas nas actividades de F:ACTS!, así
como de coordinar as labores de redacción dun manual que
recollerá todo o coñecemento xerado.
Para levar á práctica a experiencia que se vai adquirindo
en F:ACTS! elixíronse cinco áreas piloto. Unha delas é o
parque natural de Strofylia, situado na prefectura de Achaia
(Grecia). Entre as actividades programadas en F:ACTS! realízanse
visitas de estudo ás áreas piloto para identificar problemas,
facer recomendacións e descubrir boas prácticas que sexan
exportables ás rexións parceiras do proxecto.
Visitouse a área piloto de Strofylia, onde se identificaron
problemas de gobernanza producidos por unha estrutura administrativa
demasiado centralizada e sectorializada, que dificulta a
implicación dos actores locais e a consideración deles nos
procesos de toma de decisións. Dentro da visita de estudo
organizouse tamén un evento de diseminación, onde se deu
a coñecer os resultados de F:ACTS! ás autoridades locais,
membros da universidade de Patra e un representante do ministerio
de Medio Ambiente do goberno grego. Na conferencia déronse
tamén a coñecer experiencias e proxectos da rexión dos que
se aprenderon novas boas prácticas para incorporar ás xa
identificadas en F:ACTS!.
Mantivéronse tamén reunións para tratar temas relacionados
coa redacción do manual e coa organización de tres conferencias
que se celebrarán en Santiago de Compostela, Varna (Bulgaria)
e Bruxelas (Bélxica) para difundir os resultados deste proxecto
en outras rexións europeas.