Enviado por laborate o mar, 05/06/2012 - 10:17 GMT.
O pasado venres 1 de Xuño celebrouse no edificio Cactus
do campus de Lugo a cerimonia de clausura da segunda edición,
correspondente ó curso académico 2011/2012, do máster en Xestión Sustentable da Terra e Territorio (MTT).
O acto contou coa presenza do rector da USC, Juan Casares
Long, o director xeral de Agricultura e Desenvolvemento
Rural da Unión Europea, José Manuel Silva Rodríguez, o vicerrector
de Coordinación do campus de Lugo, Herradón Pedro García,
o presidente da fundación Juana de Vega,
Enrique Sáez Ponte, o subdirector xeral de Mobilidade en
Terras da Xunta de Galicia, Javier Blanco Carballal e mailo
coordinador do programa de máster, Rafael Crecente Maseda.
Durante o evento Silva Rodríguez realizou o discurso de
clausura do curso, titulado "Gobernanza na Unión Europea
e a investigación no contexto da Política Agrícola Común".
Na súa conferencia, Silva Rodríguez centrouse nos efectos
que a reforma da Política Agrícola Común
da Unión Europea (UE) pode ter sobre a mobilidade de terras
en Galicia. Na súa opinión, o efecto será moi pequeno a
non ser que esté acompañada por outras medidas gobernamentais,
tales como sancións ós propietarios de terras abandonadas.
Ó final da súa conferencia enumerou as principais características
do programa de investigación da dirección xeral de agricultura
da UE no marco dos próximos orzamentos.
No mesmo evento, o coordinador do máster, Rafael Crecente,
presentou o libro "Territorios a exame. Traballos de ordenación
territorio.", que recompila os mellores traballos de fin
de máster realizados durante a edición 2010/2011. Este libro
trata de ser un exemplo dunha visión coherente, ó tempo
que multidisciplinar, da xestión e ordenación do territorio.
Por último, cómpre salientar que se adiantaron algunhas
das principais novidades do máster para o vindeiro curso
académico. A intención do MTT - que estrea un novo logotipo,
"masterra" - é tratar de converterse un laboratorio innovador
de ideas sobre a ordenación e xestión do territorio nos
complexos tempos actuais. Para eso abrirase á sociedade,
reforzando aínda máis a transferencia de coñecemento entre
actividade investigadora e os sectores público e privado.
Proba desto é a futura colaboración entre a consellería
do Medio Rural, a fundación Juana de Vega e o grupo de investigación
LaboraTe nun proxecto de investigación sobre a dinámica
de terras en Galicia.
ligazóns relacionadas: