Enviado por laborate o xov, 28/06/2012 - 13:59 GMT.
O LaboraTe vén de facilitar, durante a xornada do 15 de Xuño
de 2012, un taller de planificación territorial con diferentes
persoas do sector agroforestal do entorno do Monte do Carrio,
ubicado nos municipios de Lalín e Vila de Cruces.
O taller é unha das actividades enmarcadas na acción piloto
do Monte do Carrio, no marco do proxecto internacional
F:ACTS!,
e tivo como obxectivo identificar as potencialidades produtivas
dende un punto de vista agroforestal para este lugar e mailo
seu entorno. Ademais, analizáronse as principais limitacións
que, na opinión dos participantes, están a frenar a valorización
integral dos numerosos recursos territoriais.
O taller buscaba tamén innovar nos enfoques e métodos de
participación dos diferentes colectivos e persoas nos procesos
de planificación clásicos. Ademais deste taller,
tense celebrado outro a finais do ano 2011
con representantes de diferentes departamentos da consellería
do Medio Rural, e está previsto a organización de máis talleres
con representantes doutros sectores.