Enviado por laborate o mar, 22/01/2013 - 10:35 GMT.
No marco do proxecto de investigación
Propiedade, mobilidade de terras e valorización territorial,
impulsado pola Fundación Juana de Vega, LaboraTe-USC e Banco
de Terras de Galicia-AGADER, tivo lugar en Santiago unha
reunión co obxecto de coordinar as accións de diferentes
actores para, a través dun proxecto piloto de carácter demostrativo,
lograr mobilizar 1000 ha de superficie para uso agrario na
actualidade infrautilizadas.
Entre os asistentes á reunión atopábanse representantes
das cooperativas Seragro, AGACA, a Fundación Juana de Vega,
O Banco de Terras de Galicia-AGADER e o Laboratorio do Territorio.
Todos compartiron o diagnóstico sobre a necesidade de aumentar
a superficie das explotacións para reducir os custes de
produción en vacún de leite.
O proxecto piloto contempla catro grandes fases: 1) identificar
a demanda real de terras; 2) localizar a oferta potencial
e lograr facela real; 3) asesorar ós gandeiros e establecer
un plan de viabilidade empresarial, organizativo e loxístico
para utilizar esa superficie, e finalmente 4) reunir o financiamento
para poñer a superficies en produción.
Os asistentes consideraron interesante a proposta e conviñeron
en continuar a traballar na definición do proxecto piloto.
Neste sentido está previsto unha próxima reunión nos vindeiros
días con agricultores demandantes de terra, onde se pretende
reflexionar sobre as principais barreiras que teñen para
acceder a máis superficies das que dispoñen.