Enviado por laborate o mér, 23/01/2013 - 13:45 GMT.
Exposición dos resultados do obradoiro
internacional sobre sistemas alimentarios locais organizado
polo MasterTerra da USC e a universidade holandesa de
Van Hall Larenstein (15 de febreiro no centro de interpretación
da reserva da biosfera, paseo do Rato).
O fornecemento de alimentos na actualidade depende dun sistema
de produción industrializado, globalizado e altamente dependente
do petróleo. Estes factores repercuten nunha serie de incertezas
futuras no que á seguridade e soberanía alimentaria se refire;
más aínda se se ten en conta o escenario actual de cambio
climático e escaseza de combustibles.
As preocupacións orixinadas por estas incertezas deron como
resultado correntes como os sistemas alimentarios locais
que intentan resolver os problemas de seguridade e soberanía
alimentaria, mediante o fomento da produción, procesado
e comercialización local de alimentos utilizando recursos
locais. Gran parte destas iniciativas céntranse na agricultura
urbana que está cobrando forza nos plans de moitas cidades,
debido ás oportunidades que ofrece para incentivar a economía
local, fomentar iniciativas sociais e mellorar a calidade
medioambiental.
Lugo ofrece moitas oportunidades á hora de implementar sistemas
alimentarios locais, dado o seu estreito vínculo coas zonas
rurais e a actividade agrícola. Boa proba delo é o éxito
das hortas urbanas do parque do Rato. Por este motivo, celebrouse
do 22 ao 27 de outubro un obradoiro internacional sobre
sistemas alimentarios locais, onde alumnos do Master Terra
da USC a Universidade Técnica de Van Hall Larenstein estudaron
as potencialidades da cidade e o seu entorno para facer
propostas sobre o desenvolvemento de sistemas alimentarios
locais. Estas propostas traducíronse en catro escenarios
que exploran o futuro de Lugo tendo en conta a agricultura
urbana.
O próximo 15 de febreiro ás 19:00h, terá lugar no centro
de interpretación da reserva da biosfera, situado no parque
do Rato, un acto onde os alumnos do Master Terra exporán
as vantaxes que os sistemas alimentarios locais e a agricultura
urbana poden ofrecer á cidade de Lugo. Os alumnos tamén
exporán os resultados do seu traballo no taller internacional
e realizarán unha serie de dinámicas, destinadas a que o
público asistente participe reflexionando sobre as ideas
presentadas e propoñendo novos escenarios e iniciativas
para a cidade.
Descargas: