Enviado por laborate o mér, 28/03/2012 - 17:28 GMT.
Xa está dispoñible na páxina web do LaboraTe para a súa
descarga gratuíta o software libre OpenRULES
(Open RUral Land use Exploration System),
destinado á planificación do uso do solo e aplicable no
proceso de delimitación de clases de solo e categorías de
ordenación de calquera plan de ordenación do territorio.
OpenRULES é un sistema de axuda para a planificación dos
usos do solo, baseado en dous programas SIX libres (gvSIG e Sextante),
sobre os que se integraron varios modelos analíticos para
axudar á toma de decisións en diferentes etapas dun proceso
de planificación do uso do solo. Estas técnicas de análise
dan soporte a tres etapas fundamentais nun modelo de ordenación
de usos do solo: avaliación da aptitude da terra para os
diferentes usos, optimización das superficies de cada uso
e localización espacial dos usos do solo. Os resultados
destas etapas son mapas de aptitude para diversos usos do
solo ou actividades, superficies óptimas para os usos do
solo rural e mapas óptimos de distribución de múltiples
usos do solo.
Trátase dun prototipo no que se segue a traballar e que
pode resultar de interese para calquera persoa, empresa,
organismo ou institución interesada na planificación territorial,
dos cales se espera recibir opinións e suxestións co fin
de acadar unha continua mellora e ampliación da aplicación.
Este aplicación informática é o resultado de varios proxectos de investigación:
- "Sistemas de información xeográfica para planeamento urbanístico e ordenación territorial mediante técnicas de optimización sobre procesadores multinúcleo" (financiado pola Xunta de Galicia)
- "Simulación do crecemento dos núcleos urbanos mediante autómatas celulares e SIX (SIMULA)" (financiado pola Xunta de Galicia)
- "Deseño dunha metodoloxía de ordenación de usos no espazo rural mediante ferramentas SIX e Teledetección" (financiado pola Xunta de Galicia
- "Sistema de Axuda á Decisión Espacial na Ordenación Territorial de Ámbito Local (SADE-OTAL)" (financiado polo Ministerio de Ciencia e Innovación)
- "Modelo Baseado en Axentes e sistema SIX-web para a elaboración, avaliación e implementación de plans de ordenación urbana e territorial" (financiado polo Ministerio de Ciencia e Innovación)