Enviado por laborate o ven, 22/02/2013 - 19:13 GMT.
O pasado venres 15 de febreiro ás sete da tarde, reuníronse
no Centro de Interpretación da Reserva da Biosfera Terras do Miño
funcionarios da Deputación Provincial, membros de ADEGA,
o Grupo de Desenvolvemento Rural de Lugo, A Cova da Terra,
O Bandullo Ecolóxico, Vida de Aldea, investigadores e alumnos
da USC e outras persoas interesadas, para participar no
seminario realizado polos alumnos do Máster en Xestión Sostible da Terra e do Territorio
(MTT). O evento celebrouse co gallo de dar a coñecer os
resultados acadados nun obradoiro internacional sobre sistemas alimentarios locais
celebrado en Lugo do 22 ao 27 de outubro, no que os estudantes
do MTT participaron con alumnos da universidade holandesa
de Van Hall Larenstein.
O acto constou de dúas presentacións: a primeira
estivo orientada a falar dos sistemas alimentarios locais
e a súa importancia á hora de facer fronte aos retos de
soberanía e seguridade alimentaria que impón a situación
socioeconómica actual. Na segunda presentación
os alumnos expuxeron os resultados do seu traballo cos alumnos
holandeses no obradoiro internacional. Estes resultados
baseábanse en catro escenarios para a cidade de Lugo.
As dúas presentacións foron acompañadas dunha serie de dinámicas
de grupo destinadas a reflexionar sobre os conceptos e ideas
expostos e cómo poderían ser utilizados para incrementar
a sostibilidade da cidade de Lugo e a súa bisbarra.
As dinámicas comezaron cunha formulación de desexos por
parte dos asistentes sobre cómo lles gustaría que fose o
futuro de Lugo, estes desexos condensáronse arredor de cinco
ideas:
- Un Lugo máis verde
- Un Lugo con maior calidade de vida
- Un Lugo no que a agricultura e os usos urbanos estivesen máis integrados
- Un Lugo con maior soberanía alimentaria
- Un Lugo máis sostible
Posteriormente, propuxéronse estratexias a seguir para acadar
estes cinco obxectivos tomando como base os sistemas alimentarios
locais. Os asistentes valoraron as estratexias do 1 ao 3
en base a se eran realizables a curto (1) medio (2) ou longo
prazo (3). As estratexias máis votadas foron as seguintes:
- (1) Potenciar o mercado da praza de abastos
- (1) Empregar residuos orgánicos para facer compostaxe
- (2) Crear novas hortas dentro do casco urbano (incluso dentro da muralla), crear postos de venda nas hortas con horarios flexibles
- (2) Facer campañas de concienciación nas escolas
- (3) Aumentar o apoio institucional á agricultura urbana facendo modificacións no planeamento que permitan o emprazamento de novas hortas en terreos baldíos
- (3) Recuperar a agricultura tradicional local e ecolóxica e facer campañas de formación para que todo o mundo saiba cultivar os seus alimentos
Finalmente, estas estratexias foron utilizadas para que
os asistentes ideasen unha visión para o futuro de Lugo.
Para elo formáronse catro grupos que deseñaron sobre un
plano en branco catro visións.
As catro visións, prevían prolongar o cinto verde de Lugo
e crear zonas verdes con hortas dentro da cidade. As hortas
irían acompañadas de espazos para a comercialización e intercambio
dos alimentos producidos nelas, así como dunha rede de compostaxe
cunha serie de puntos de procesado, localizados nas zonas
de maior produción de residuos orgánicos (cerca de zonas
comerciais e grandes zonas verdes). Tamén se propuxo modificar
a rede de transporte urbano para conectar mellor as zonas
rurais e urbanas. Asemade, propúxose crear unha rede de
ciclovías que vertebrasen e integrasen as hortas e zonas
verdes co resto da cidade. Por último, nun dos grupos propúxose
utilizar árbores froiteiras nas zonas axardinadas para que
a xente puidese recoller os froitos.
Descargas: