Enviado por laborate o lun, 29/10/2012 - 13:12 GMT.
O pasado sábado 27 de Outubro tivo lugar no
IBADER
a presentación dos resultados do Seminario Internacional sobre Sistemas Alimentarios Locais,
organizado polo Máster en Xestión Sustentable da Terra e
do Territorio e maila Universidade de Van Hall Larenstein (Holanda).
Neste seminario colaboraron 9 estudantes de Holanda cos
19 alumnos do Máster en Xestión Sustentable da Terra e do Territorio
para estudar e xerar propostas destinadas a fomentar o desenvolvemento
de sistemas alimentarios locais na cidade de Lugo e as súas
inmediacións.
Nos cinco días que durou o evento, os alumnos asistiron
ás charlas impartidas polo profesor Alfonso Morales
- experto en sistemas alimentarios locais da Universidade de Wisconsin-Madison
(Estados Unidos) -, realizaron entrevistas a produtores
locais e vendedores na praza de abastos de Lugo, a membros
da federación de varias asociacións de veciños, a
Sonsoles López Izquierdo,
da Deputación de Lugo, a monitores e usuarios das
hortas do río Rato,
á concelleira de infraestruturas do concello de Lugo, Paz
Abraira, ó arquitecto Alberte Rodríguez e á representante
da ONG ecoloxista ADEGA, Adela Figueroa. Tamén se realizou
unha visita á granxa Vida de Aldea, proxecto que intenta
buscar alternativas creativas para xerar novas fontes de
ingresos como o aluguer de parcelas para facer hortas ou
a restauración de edificios obsoletos da explotación para
o seu aluguer como salóns onde celebrar eventos.
A labor dos estudantes deu como resultado a creación de
catro escenarios posibles para a cidade de Lugo, en función
da cantidade de recursos económicos dispoñibles nun futuro
e da concienciación do público sobre aspectos ambientais
e de seguridade alimentaria:
- Malo, Peor, Desastre; no suposto de poucos recursos e pouca concienciación,
- Lugo a Gran Escala; no suposto de moitos recursos e pouca concienciación,
- A Crise Pide Creatividade; no suposto de poucos recursos e moita concienciación,
- O Paraíso Verde; no suposto de moitos recursos e moita concienciación.
Estes escenarios achegan ideas novedosas e creativas para
fomentar a agricultura urbana e o comercio de produtos locais.
A perspectiva de alumnos que aínda non teñen unha traxectoria
profesional, achega unha visión alternativa dado a que os
estudantes aínda non están influenciados por ideas preconcebidas
dentro do ámbito de traballo da súas especialidades. A maiores,
a participación de alumnos estranxeiros achega novos modos
de traballar e unha análise dos problemas dende fóra do
contexto analizado. Todo elo levou a propostas alternativas
e imaxinativas para facer participe a Lugo dos beneficios
do fomento dun sistema alimentario local.
descargas:
- "Bad, Worst, Disaster" (en inglés) [PDF, ~1,4 MB]
- "Crisis asks for creativity" (en inglés) [PDF, 3,4 MB]
- "Green paradise" (en inglés) [PDF, ~4 MB]
- "Large scale Lugo" (en inglés) [PDF, ~4,1 MB]
- "The foodlandscape of Lugo" (en inglés) [PDF, ~3,6 MB]