SITe

O visor SIX participativo do SITe “PPGIS Web” funciona como unha ferramenta para a consulta de información cartográfica e alfanumérica, ao mesmo tempo que permite a interacción na interface editando nova cartografía de interese por parte de calquera usuario rexistrado. Está deseñada para que un usuario sen coñecementos en programación poida configurar, de xeito doado, un visor SIX web para procesos de captura e edición participativa de información xeográfica.

A cartografía e a súa información asociada poderase dispoñer de forma pública para consulta de toda a audiencia ou de forma privada, só para o editor da mesma (e o equipo administrador do portal). Tamén permite a composición de mapas temáticos con elementos cartográficos, tales coma lenda, barra escala, etc., e a súa impresión a formato non editable (PDF).

“PPGIS App” é unha aplicación para Android que, instalada nun smartphone, permite conectarse e sincronizar información cun proxecto concreto do visor “PPGIS Web”. Deste xeito, o usuario pode ver e editar en tempo real a información existente no visor web principal dende o móbil, mediante unha interface máis cómoda para a participación sen necesidade doutros dispositivos como tablets ou ordenadores persoais. A PPGIS App conéctase e mostra unha versión simplificada dos datos existentes no servidor central, permitindo editar a información cunha funcionalidade similar á do modo nativo. A súa descarga e instalación poden facerse directamente dende o sitio web de cada proxecto.

Os traballos e investigacións do grupo permitiron desenvolver ao longo do tempo diversos algoritmos de xestión da información espacial, programados en diferentes linguaxes e plataformas. Estes algoritmos constitúen un conxunto de ferramentas de grande utilidade, que no SITe se organizan e dispoñen de maneira centralizada.

Algúns destes algoritmos son:

-Open Rules:

Conxunto de 11 algoritmos orientados á ordenación optimizada de usos agroforestais. Ofrecen varias alternativas (metodoloxías científicas contrastadas para a avaliación de terras, a optimización de superficies e a ordenación espacial de usos.

Existen versións para distintos SIX, dende RULES sobre Geomedia e programado en Visual Basic, OpenRules 2 sobre gvSIG en Java, ata a actual OpenRules 3 en QGIS con Python.

-AGRUPE:

Ferramenta de Axuda á Decisión para a permuta de parcelas, permitindo agrupar fincas máis grandes e próximas á explotación, reducindo tempos e custos respecto da reestruturación parcelaria clásica. Utiliza algoritmos xenéticos para propoñer permutas entre un grupo de propietarios mantendo o plano catastral, pero reorganizando as parcelas para que cada propietario posúa superficies máis preto e/ou próximas entre si.

-Algoritmos INVERCLIMA/CLIMAPLAN-DSSUSC

Os proxectos INVERCLIMA e CLIMAPLAN-DSS traballaron na delimitación de elementos da Infraestrutura Verde, nos que se desenvolveron algoritmos de delimitación automática destas zonas a partir de cartografía previa. Inclúe scripts en linguaxe R para obter cálculos de provisión e análise de sinerxías e antagonismos, así como algoritmos en C para a delimitación automática de zonas de amortecemento e áreas multifuncionais.

Este compoñente, aínda en fase de prototipo cunha única instancia operativa, permitirá servir parte ou a totalidade dos algoritmos do SITe a través da web. Deste xeito, cada visor SIX poderá solicitar un cálculo específico realizado por un dos algoritmos, enviando os parámetros necesarios e recuperando o resultado como un mapa ou produto directamente no visor web.

Este compoñente permite liberar ao visor de tarefas de cálculo moi esixentes, facendo que os usuarios reciban unicamente o resultado final sen bloquear o funcionamento do visor SIX.

Moitos proxectos do grupo xeran conxuntos de datos e capas de información orixinais que, aínda que creadas para fins específicos, poden resultar útiles noutros.

Estes datos fóronse compilando nunha estrutura interna chamada IDE-LaboraTE, que, sen ser formalmente unha IDE pública, , permite organizar a información nun formato SIX común empregable, permitindo a súa inclusión en distintos proxectos que utilizan visores SIX cando esta información poida ser de utilidade.