TERRACTIVA ofrece unha proposta metodolóxica para apoiar ás persoas novas entrantes (NE) que se incorporan por primeira vez na agricultura e na gandaría. Por este motivo, diríxese principalmente ás entidades e profesionais que, dun xeito ou doutro, acompañan e asesoran ás NE no inicio da súa actividade, así como a aquelas que desexan comezar a prestar este tipo de apoio. Con todo, as propias persoas novas entrantes tamén poden facer uso dos recursos dispoñibles.

A parte máis visual de TERRACTIVA consiste nun visor web acompañado dun SIX básico, adaptable ás necesidades de cada entidade. Este visor está deseñado para reunir recursos que orienten e apoien ás novas persoas entrantes nun territorio concreto, podendo incluír desde experiencias inspiradoras ata guías sobre actividades agrarias con potencial na comarca.

O SIX e o seu visor asociado funcionan como ferramentas de apoio, que se adaptan ás prioridades de cada entidade ou profesional. Poden integrar diferentes recursos territoriais, como terra dispoñible, localización de servizos (talleres, matadoiros, entidades de asesoramento, produtores de sementes, cooperativas, etc.). Ademais, se a entidade desexa ir un paso máis alá, pode convertelo nunha ferramenta participativa onde as usuarias e os usuarios poidan incorporar os seus propios recursos (desde parcelas ata oficinas de técnicos agrícolas).

En conxunto, estes servizos web funcionan como unha auténtica caixa de ferramentas para organizar e poñer a disposición unha variedade de recursos destinados a apoiar ás persoas novas entrantes. O contido final dependerá de múltiples factores, entre eles o grao de implicación que cada entidade ou profesional queira asumir no labor de asesoramento.