Xa está aberto o prazo de matrícula do novo Máster Universitario en Enxeñaría da Paisaxe, Infraestrutura Verde e Transición Rural, unha proposta formativa da Universidade de Santiago de Compostela orientada a formar profesionais capaces de dar resposta aos grandes retos ambientais e territoriais do século XXI. O programa combinará coñecementos sobre planificación territorial, restauración ecolóxica, transición verde e desenvolvemento rural.
Trátase dun mestrado de 60 créditos ECTS e un curso académico de duración, deseñado para facilitar a compatibilidade coa actividade profesional. A súa modalidade híbrida combina docencia en liña e presencial, cun reparto aproximado do 50 % en videoconferencia e 50 % presencial, ao que se suma a posibilidade de cursalo con matrícula a tempo parcial. Ademais, inclúe prácticas académicas externas que permiten ao alumnado entrar en contacto con contornos profesionais reais.
A formación está orientada á empregabilidade en ámbitos como a administración pública, a consultoría ambiental e territorial, a planificación da paisaxe, o desenvolvemento rural ou a investigación, proporcionando unha visión multidisciplinar dos procesos actuais de transformación dos territorios.
Dúas especialidades para abordar os retos da transición verde
O programa xorde nun contexto marcado polas novas políticas europeas de transición verde, restauración da natureza e infraestrutura verde, que están a transformar a maneira de abordar a xestión dos recursos naturais, a planificación da paisaxe e o desenvolvemento dos territorios rurais. Neste escenario, a formación especializada convértese nun elemento clave para acompañar a adaptación das administracións, empresas e organizacións aos novos desafíos ambientais.
O plan de estudos articúlase arredor de materias como a ordenación do territorio rural e da paisaxe, a economía e restauración ecolóxica, as políticas de desenvolvemento rural, as tecnoloxías da información xeoespacial ou a transición verde en áreas rurais.
Un dos aspectos máis atractivos do mestrado é a posibilidade de especializarse en dous itinerarios complementarios. Por unha banda, a especialidade en Infraestrutura Verde e Paisaxe afonda no deseño da paisaxe, a planificación da infraestrutura verde, a bioenxeñaría da paisaxe e a restauración ecolóxica aplicada. Pola outra, a especialidade en Transición Verde céntrase nas dinámicas de transición agroecolóxica, na xestión e administración de terras e na análise dos sistemas socioecolóxicos rurais desde unha perspectiva territorial.
Moitos destes contidos conectan directamente coas áreas de investigación e acción desenvolvidas polo LaboraTe. En particular, o máster aborda cuestións ligadas á ordenación e transición territorial, á xestión de terras, á infraestrutura verde, á restauración ambiental e aos sistemas rurais, ámbitos cada vez máis relevantes na procura de modelos territoriais sostibles, resilientes e adaptados aos cambios ambientais e sociais.
As persoas interesadas poden consultar toda a información sobre o programa e o proceso de matrícula na páxina web da USC e no programa: