Saltar ao contido

O noroeste peninsular fronte ao reto demográfico: diagnóstico e propostas para o medio rural

O pasado 16 de abril publicouse o “Informe de Ruralidades do Noroeste Peninsular: Diagnóstico Estrutural e Marco Estratéxico de Actuación”.

Este informe ofrece un diagnóstico territorial e socio‑ecolóxico das áreas rurais do noroeste peninsular (Galicia, Asturias e o noroeste de Castela e León). O obxectivo é identificar os factores estruturais do declive demográfico e definir direccións estratéxicas de intervención aliñadas coa II Estratexia de Equidade Territorial e Reto Demográfico, priorizando a xeración de iniciativas e liñas de actuación que orienten o deseño de políticas públicas a longo prazo.

O Laboratorio do Territorio foi o encargado de desenvolver a análise e as propostas de actuación vinculadas ao abandono da terra agraria e ao descoñecemento da propiedade dos terreos rústicos e das edificacións. Así mesmo, colaborou nas medidas relacionadas coa transición enerxética.

Entre as liñas de actuación propostas para abordar estas cuestións destacan o incremento de recursos e actuacións para a implantación de instrumentos de mobilización e recuperación da terra agraria, como os introducidos pola Lei de recuperación da terra agraria de Galicia (polígonos agroforestais ou agrupacións de xestión conxunta); a aplicación intensiva dos procedementos de investigación da propiedade da terra e das edificacións; a necesidade de establecer incentivos fiscais; e o fomento de sistemas agroforestais diversificados.

Este informe foi encargado pola Secretaría Xeral para o Reto Demográfico a diversos investigadores de universidades da zona Noroeste no marco do desenvolvemento da nova política de reto demográfico. A USC participou nel a través das profesoras Inés Santé, membro do Laboratorio do Territorio, e Emilio Díaz.

O informe foi presentado no marco do III Encontro Nacional da REDCIT.