Investigación-acción participativa
A investigación-acción participativa constitúe un dos piares fundamentais do LaboraTe, definíndose como un elemento transversal e un principio metodolóxico xeral que guía boa parte da nosa actividade.
O noso enfoque fuxe das dinámicas extractivas de coñecemento, apostando por unha investigación que actúe como motor de cambios e que estea, polo tanto, enraizada no territorio e conectada coas persoas que o habitan. Esta abordaxe operacionalízase a través de varios puntos clave:
1. Transformación social e territorial: O obxectivo transcende a análise teórica para xerar proxectos que teñan un impacto real e transformador no medio rural, axudando a mudar as inercias políticas e institucionais.
2. Co-creación e facilitación: O grupo destaca pola súa longa experiencia na organización de obradoiros e procesos participativos para acelerar a innovación no medio rural ou onde se deseñan políticas públicas de xeito conxunto. Para integrar múltiples perspectivas, utilízanse dende técnicas de facilitación clásicas ata metodoloxías innovadoras e tecnolóxicas como o PPGIS (Sistemas de Información Xeográfica Participativos).
3. Acompañamento de axentes locais: Unha parte esencial do noso labor é acompañar aos actores do territorio para que sexan eles quen lideren procesos clave, como a mobilización de terras abandonadas. Ao tempo, aprendemos uns doutros xerando novos camiños compartidos.
4.Ciencia cidadá e diálogo: Promóvese o respecto polos coñecementos comunitarios e a participación activa da cidadanía na monitorización e xestión do seu contorno. Aínda que a “ciencia cidadá” poida semellar un concepto novo, o grupo leva abogando polos procesos multi-actor e a co-creación dende hai máis de 20 anos, baseándose na súa consolidada traxectoria e experiencia en participación.
En resumo, a investigación-acción participativa no LaboraTe enténdese como unha ponte entre a academia e a realidade social, onde a investigación se entende coma unha ferramenta de transformación ao servizo do benestar colectivo e da sustentabilidade do territorio rural.